En il Plan d'instrucziun 21 servan ils plans d'instrucziun dals moduls a descriver incumbensas interdisciplinaras da la scola ed a garantir in svilup sistematic da las cumpetenzas per ina part centrala da questas incumbensas. Moduls han in budget da temp limità betg nuninterrut.
Sco ils plans d'instrucziun dals roms èn ils plans d'instrucziun dals moduls dividids en chapitels introductivs (impurtanza e finamiras, infurmaziuns didacticas, infurmaziuns davart la structura ed il cuntegn) ed en la preschentaziun dal svilup da las cumpetenzas. Il plan d'instrucziun dal modul medias ed informatica distingua d'ina vart ils champs da cumpetenza medias ed informatica e da l'autra vart las cumpetenzas per applitgar tecnologias d'infurmaziun e da communicaziun, che vegnan designadas sco cumpetenzas d'applicaziun. Tar ils champs da cumpetenza medias ed informatica cuntegna il plan d'instrucziun dal modul ils svilups da las cumpetenzas. Las cumpetenzas d'applicaziun vegnan instruidas entaifer ils roms. Perquai na cuntegna il plan d'instrucziun dal modul nagin agen svilup da cumpetenzas, mabain mo ina survista cun renviaments als roms, en ils quals las cumpetenzas d'applicaziun vegnan instruidas.
Per lavurar vi dals moduls stattan a disposiziun lecziuns tenor la tavla da lecziuns.
